WWW.YOURKATTANKUDY.COM

– SHM

ரியோ: அர்ஜென்டினாவைவிட ஜெர்மனி சிறந்த அணி என்பதற்கும், அந்த அணியே கோப்பையை வெல்ல தகுதியான அணி என்பதற்கும் பல காரணங்கள் உள்ளன. உலக கோப்பை ஒரு தரமான அணியின் கைகளில் தஞ்சம் புகுந்துள்ளதில் வியப்பேதுமில்லை என்பது, ஜெர்மனி மற்றும் ஆர்ஜென்டினா நடுவேயான ஒப்பீட்டை பார்த்தால் தெரிந்துவிடும்.

ஜெர்மனி கோல் காப்பாளர் மனுவேல் நெயுர் மிகச்சிறப்பாக செயல்பட்டார். இதற்காக தங்க கையுறை விருதை அவர் தட்டிச் சென்றுள்ளார். அரையிறுதி போட்டியில் ஜெர்மனி 7 கோல் அடித்தபோதும், பிரேசில் பதிலுக்கு ஒரு கோல்தான் போட முடிந்தது. இதற்கு ஜெர்மனியின் தடுப்பு ஆட்டக்காரர்கள் ஒரு காரணம் என்றால், மனுவேல் நெயுரும் மிக முக்கிய காரணம். இவருக்கு அணியின் தடுப்பாட்டக்காரர், மேட்ஸ் ஹுமேல் மிகச்சிறப்பாக ஒத்துழைப்பு கொடுத்தார்.

லியோனல் மெஸ்சி என்ற ஒரு நட்சத்திர வீரரை மட்டுமே ஆர்ஜென்டினா சார்ந்து விளையாடியது. , அகுயேரோ, ஹிகுயைன், லவேஸ்சி ஆகிய நல்ல வீரர்கள் இருந்தாலும், ஏனோ சோபிக்கவில்லை. பெனால்டி ஷூட்டுகளை தவிர்த்து, அர்ஜென்டினா அடித்த 7 கோல்களில், 6 கோல்களுக்கு மெஸ்சி நேரடியாகவோ அல்லது மறைமுகமாகவோ உதவியுள்ளார். இதை வைத்தே ஆர்ஜென்டினாவின் பிற வீரர்கள் ஆட்டத்தை தெரிந்துகொள்ள முடியும்.

1986ம் ஆண்டு மரடோனா தனியாளாக ஆர்ஜென்டினாவை கோப்பையை வெல்ல வைத்தார். ஆனால் தொழில்நுட்பம் உச்சத்தில் இருக்கும் இக்காலகட்டத்தில் ஒரு வீரரின் சாதக, பாதக அம்சங்களை எளிதில் கண்டறிந்து அதை எதிரணியினர் தடுக்க முடியும் என்பதால் மெஸ்சியால், இறுதி போட்டியில் மஜிக் காண்பிக்க முடியவில்லை.

ஜெர்மனி ஒருங்கிணைந்த ஆட்டத்தை வெளிப்படுத்தியது.  முல்லர், குளோஸ், நெயுர் என திரும்பிய பக்கமெல்லாம் நட்சத்திரங்களாக காட்சியளிக்கிறது அந்த அணி. இதில் பலரும் தனித்திறமையை வெளிக்காட்டி விளையாடாததால் ஆசிய நாடுகளுக்கு பரிட்சையமில்லாதவர்கள். ஆனால் ஒருங்கிணைந்த வீர்ரகள். அடுத்தடுத்து நான்கு உலக கோப்பை போட்டிகளில் அரையிறுதிக்கு ஜெர்மனி வந்துள்ளது அந்த வீரர்கள் அனைவரின் ஒருங்கிணைப்புக்கு சான்று.

அரையிறுதியில், பிரேசிலுடன் பெற்ற அபார வெற்றி உளவியல் ரீதியாக ஜெர்மனியின் தன்னம்பிக்கையை மிகவும் அதிகப்படுத்தியிருந்தது. அதே நேரம், அரையிறுதியில், நெதர்லாந்தை, ஆர்ஜென்டினா எளிதில் வீழ்த்த முடியவில்லை. மிகவும் போராடி, பெனால்டி ஷூட்டில்தான் ஆர்ஜென்டினா வெற்றி கண்டது. எனவே ஜெர்மனியின் உச்சாகத்தோடு, ஆர்ஜென்டினாவின் வெற்றி உற்சாகத்தை ஒப்பிட முடியாது. இவை போன்ற காரணங்கள் ஜெர்மனியை உலக சம்பியனாக்க உதவின.