WWW.YOURKATTANKUDY.COM

-MJ

தற்பொழுது ஐரோப்பாவில் ஏற்பட்டுள்ள குளிர்கால உறைபனியால் அந்நாடுகளின் இயல்பு நிலை பாதிக்கப்பட்டிருக்கின்றன.

பிரித்தாணியாவிலும் கடந்த 3 நாட்களாகத் தொடரும் உறைபனி காரணமாக நூற்றுக்கணக்கான பாடசாலைகள் மூடப்பட்டிருக்கின்றன. போக்குவரத்துக்களும் சில பகுதிகளில் இடைநிறுத்தப்பட்டிருப்பதுடன் அநேகமான இடங்களில் மட்டுப்படுத்தப்பட்ட சேவைகள் ஈடுபடுத்தப்படுகின்றன.

ரயில் போக்குவரத்துக்கள் அநேகமான பகுதிகளில் பாதிக்கப்பட்டிருப்பதுடன், தாமதித்த சேவைகளால் பயணிகள் பெரிதும் பாதிக்கப்பட்டிருக்கின்றனர்.

லண்டன் ஹீத்ரோ விமான நிலையத்தில் 100 விமானங்களின் நேர அட்டவணைகள் பிற்போடப்பட்டன். 67 விமானங்கள் புறப்பட 33 விமானங்கள் மாத்திரம் தரையிறக்கப்பட்டிருந்தன.

விமானசேவை இடைநிறுத்தப்பட்டதாலும், பிற்போடப்பட்டதாலும் ஆயிரக்கணக்கான பயணிகள் அசௌகரியங்களை எதிர்நோக்கினர். மைனஸ் 3 தொடக்கம் மைனஸ் 7 வரை தற்போதுள்ள மோசமான காலநிலையால் பயணிகள் மேலும் அவதிப்பட்டனர். இதனால் விசேட உறங்கல் விரிப்புக்களும் ஏனைய வசதிகளும் ஹீத்ரோ விமான நிலையத்தில் நேற்றிரவு பயணிகளுக்கு வழங்கப்பட்டன.

மேலதிக உறைபனி தொடர்ந்து எதிர்பார்க்கப்படுவதால் பயணிகள் விமான, ரயில், தரைப் போக்குவரத்துக்களை உரிய இணையத்தளங்கள் ஊடாக புதிய போக்குவரத்து நடைமுறைகளையும் மாற்றங்களையும்  அறந்துகொள்ளுமாறும் கேட்கப்பட்டிருக்கின்றனர்.