WWW.YOURKATTANKUDY.COM

கிழக்கு, வடமத்திய மற்றும் சப்ரகமுவ ஆகிய மூன்று மாகாண சபைகளுக்குமான இறுதிக்கட்ட சூறாவளி தேர்தல் பிரசார நடவடிக்கைகள் இன்று புதன்கிழமை நள்ளிரவுடன் நிறைவு பெறுகின்றது. பிரசார நடவடிக்கைகள் நிறைவடைந்ததன் பின்னர் மாகாண சபைத்தேர்தல் சட்டதிட்டங்களை மீறுகின்றவர்களுக்கு ௭திராகக் கடுமையான நடவடிக்கைகளை ௭டுக்குமாறு திணைக்களம் பொலிஸாருக்கு பணித்துள்ளது.

கலைக்கப்பட்ட மூன்று மாகாண சபைகளுக்குமான வேட்பு மனுத்தாக்கல் ஜூலை 12 ஆம் திகதியுடன் நிறைவடைந்ததன் பின்னர் கட்சிகள் மற்றும் சுயேச்சை குழுக்களின் பிரசார நடவடிக்கைகள் சூடுபிடிக்க ஆரம்பித்தன. இந்நிலையில் மூன்று மாகாண சபைகளுக்கான தேர்தலின் இறுதி சந்தர்ப்பத்தின் போது வன்முறை சம்பவங்கள் அதிகரிக்கக்கூடிய சாத்தியக்கூறுகள் இருப்பதாக தேர்தல் கண்காணிப்பு குழுக்கள் ௭ச்சரிக்கை விடுத்துள்ளன.

ஆளும் கட்சியை சேர்ந்த அமைச்சர்கள்,பிரதியமைச்சர்கள் மற்றும் பாராளுமன்ற உறுப்பினர் அந்ததந்த மாகாணங்களில் முகாமிட்டு பிரசார நடவடிக்கையில் ஈடுபட்டனர். ஐக்கிய மக்கள் சுதந்திர முன்னணியின் சார்பில் போட்டியிடுகின்ற வேட்பாளர்களின் வெற்றிக்காக முன்னணியின் தலைவரும் ஜனாதிபதியுமான மஹிந்த ராஜபக்ஷ மாவட்ட மட்டத்தில் பிரதான கூட்டங்களை நடத்தினார்.

பிரதான ௭திர்க்கட்சியின் தலைவரும் ஐக்கிய தேசியக்கட்சியின் தலைவருமான ரணில் விக்கிரமசிங்க பாராளுமன்ற உறுப்பினர்களின் பட்டாளத்துடன் மூன்று மாகாணங்களிலும் முகாமிட்டு பிரசார நடவடிக்கைகளில் ஈடுபட்டிருந்தார். அதுமட்டுமின்றி பிரதேச தலைவர்கள் வீடு வீடாக சென்று பிரசார நடவடிக்கைகளில் ஈடுபட்டனர்.

தமிழ் தேசியக்கூட்டமைப்பு அதன் தலைவர் இரா.சம்பந்தன் தலைமையில் பாராளுமன்ற உறுப்பினர்களின் பங்குபற்றலில் கிழக்கு மாகாணத்தில் இரு மாவட்டங்களையும் பிரதிநிதித்துவப்படுத்தும் வேட்பாளர்களின் வெற்றிக்காக பிரசார நடவடிக்கைகளை அவ்விரு மாகாணங்களிலும் விஸ்தீரணப்படுத்தியிருந்தது.

அதேபோல ஸ்ரீலங்கா முஸ்லிம் காங்கிரஸ் அதன் தலைவரும் அமைச்சருமான ரவூப் ஹக்கீம் தலைமையிலான குழுவினர் கிழக்கு மாகாணத்தில் பிரசார நடவடிக்கைகளில் ஈடுபட்டிருந்தனர்.

மக்கள் விடுதலை முன்னணி அதன் தலைவர் சோமவங்ச அமரசிங்க தலைமையில் பிரசார கூட்டங்களை முன்னெடுத்தது. அதில் பாராளுமன்ற உறுப்பினர்களும் முன்னாள் பாராளுமன்ற உறுப்பினர்கள் மற்றும் தொழிற்சங்க பிரதிநிதிகளும் பங்கேற்றனர்.

இதேவேளை சப்ரகமுவ மாகாணத்தில் தனித்துக் களமிறங்கியுள்ள மலையகக் கூட்டணி இருமாவட்டங்களிலும் தமிழ் பிரதிநிதித்துவத்தை உருவாக்குவதற்காக களத்தில் குதித்திருந்தது. இதில் இலங்கை தொழிலாளர் காங்கிரஸின் செயலாளரும் அமைச்சருமான ஆறுமுகன் தொண்டமான் தலைமையிலான குழுவினரும், மலையக மக்கள் முன்னணியின் தலைவி சாந்தினி சந்திரசேகரன் தலைமையிலான குழுவினரும், ஜனநாயக மக்கள் முன்னணியின் தலைவரும் முன்னாள் பாராளுமன்ற உறுப்பினருமான மனோ கணேசன் தலைமையிலான குழுவினரும் பிரசார நடவடிக்கைகளை முன்னெடுத்தனர்.

தேர்தல் பிரசார நடவடிக்கைகள் இன்று புதன்கிழமை நள்ளிரவு 12 மணியுடன் நிறைவுக்கு வரவிருக்கின்ற நிலையில் ஐக்கிய மக்கள் சுதந்திர முன்னணி ஜனாதிபதி மஹிந்த ராஜபக்ஷ தலைமையில் அம்பாறை மாவட்டத்தில் தெஹியத்த கண்டியில் இறுதிக்கூட்டத்தை நடத்தவிருக்கின்றது.

ஐக்கிய தேசியக்கட்சியின் 66 ஆவது வருடாந்த மாநாடு கட்சியின் தலைமையகமான ஸ்ரீகொத்தாவில் இன்று நடைபெறுவதற்கான ஏற்பாடுகள் மேற்கொள்ளப்பட்டிருப்பதனால் அக்கட்சியின் இறுதி பிரசாரக் கூட்டம் கட்சியின் தலைவர் ரணில் விக்ரமசிங்க தலைமையில் கேகாலையில் நேற்று நடைபெற்றது.

மக்கள் விடுதலை முன்னணியின் இறுதிக்கூட்டம் அக்கட்சியின் தலைவர் சோமவங்ச அமரசிங்க தலைமையில் அனுராதபுரத்திலும் மலையக கூட்டணியின் இறுதிக் கூட்டம் இரத்தினபுரி மற்றும் யட்டியாந்தோட்டை ஆகிய இரண்டு இடங்களிலும் நடைபெறும். இக்கூட்டத்தில் கூட்டணியில் அங்கம் வகிக்கும் சகல உறுப்பினர்களும் பங்கேற்பர். தமிழ் தேசியக்கூட்டமைப்பின் இறுதிக்கூட்டம் தலைவர் இரா.சம்பந்தன் தலைமையில் பாராளுமன்ற உறுப்பினர்களின் பங்குபற்றலுடன் மட்டக்களப்பு மாவட்டத்தில் களுதாவளையில் நடைபெறும்.

அத்துடன் ஸ்ரீலங்கா முஸ்லிம் காங்கிரஸின் இறுதிக் கூட்டம் தலைவரும் அமைச்சருமான ரவூப் ஹக்கீம் தலைமையில் அட்டாளைச்சேனை,சம்மாந்துறை மற்றும் கல்முனை ஆகிய இடங்களில் நடைபெறும். பிரசார நடவடிக்கைகள் இன்று நள்ளிரவுடன் நிறைவடையவுள்ள நிலையில் கட்சி,சுயேச்சைகுழுக்களையோ இன்றேல் வேட்பாளர்களையோ ஆதரிக்கும் வகையில் கூட்டங்கள், பாதயாத்திரை, பேரணி, இசைக்கச்சேரி இன்றேல் ௭திர்ப்பு ஆர்ப்பாட்டங்களை நடத்தக்கூடாது ௭ன்று அறிவித்துள்ள தேர்தல்கள் திணைக்களம் அவ்வாறான செயற்பாடுகளில் ஈடுபடுவோருக்கு ௭திராக கடும் நடவடிக்கை ௭டுக்குமாறு பொலிஸாருக்கு பணித்துள்ளது.

இந்நிலையில் மூன்று மாகாண சபைத்தேர்தலின் போதும் தேர்தல் வன்முறை சம்பவங்கள் அதிகரிக்கக்கூடிய சாத்தியக் கூறுகள் இருப்பதாக தேர்தல்கள் கண்காணிப்பில் ஈடுபடுகின்ற கபே, நீதியானதும் சுதந்திரமானதுமான மக்களுக்கான தேர்தல் இயக்கம் மற்றும் தேர்தல் கண்காணிப்பு தொகுதி ஆகியன ௭ச்சரிக்கை விடுத்துள்ளன.

தேர்தல் வன்முறை சம்பவங்கள் இடம்பெறக்கூடும் ௭ன இனங்காணப்பட்டுள்ள மாவட்டங்களில் கூடுதலான பொலிஸாரை பாதுகாப்பு கடமையில் ஈடுபடுத்துவதற்கான நடவடிக்கைகளை ௭டுக்குமாறும் அவ்வமைப்புகள் தேர்தல்கள் ஆணையாளரின் கவனத்திற்கு கொண்டுவந்துள்ள அந்த கண்காணிப்பு குழுக்கள் சுமார் 3500 க்கு மேற்பட்ட கண்காணிப்பாளர்களை தேர்தல் கண்காணிப்பு பணியில் ஈடுபடுத்தியுள்ளது.

வீரகேசரி